O vindeiro 9 de Xuño, a Señora Carmen será a protagonista do programa "Alalá"

A Señora Carmen segue a estar de actualidade pola publicación de "Na flor dos meus anos" (PAI-Música 2007), o seu debut discográfico en solitario. A Televisión de Galicia, concretamente o programa Alalá que dirixe Senén Bernárdez e presenta Pilar García Rego, faralle un programa especial o luns 9 de xuño, onde a Señora Carmen hanos amosar o seu lado máis humano e relataranos as súas lembranzas, en claro contraste coa Galicia de hoxe. Ademais, como non podería ser doutro xeito, interpretará algunhas das cancións que compoñen o seu magnífico traballo discográfico.

Así mesmo, logo da súa mini-xira por Arxentina, o 10 de xuño a Señora Carmen vai a Santander para actuar no Palacio de Festivales de Cantabria xunto con Malvela. Sen dúbida, unha auténtica embaixadora da música galega tradicional.